САД ќе го земат Гренланд на овој или оној начин, кажа Доналд Трамп во своето обраќање во Конгресот ноќеска, при што го нагласи правото на островот на самоопределување. Обраќајќи им се на жителите на Гренланд, Трамп изјави:

„Ние силно го поддржуваме вашето право да ја определите вашата иднина. Ако изберете така, ќе бидете добредојдени во Соединетите Американски Држави“.

Тој потоа додаде дека Гренланд им е потребен на САД заради националната и меѓународната безбедност.

„Работиме со сите вклучени за да се обидеме да го добиеме. И мислам дека ќе го добиеме на овој или оној начин. Ќе го добиеме“, нагласи Трамп.

Околу 85% од жителите на Гренланд се противат на идејата тој да стане дел од САД, а премиерот Муте Егеде кажа дека не сакаат да бидат Американци.

„Ќе ве држиме безбедни, ќе ве направиме богати и ќе го однесеме Гренланд до височини што не можете да ги замислите“, рече Трамп.