Кина и САД продолжуваат да ја засилуваат трговската војна, па Пекинг денеска му воведе нови одмазднички царини на Вашингтон од 84%. Кинеското министерство за финансии кажа дека оваа мерка ќе стапи на сила утре.

Пекинг реагираше откако денеска почнаа да важат американските царини од 104% за увозот од Кина, која првично им одговори на САД со давачки од 34%.

Кина е најтешко погодена од државите на кои Доналд Трамп денеска им воведе реципрочни царини, кои предизвикаа потрес во светскиот трговски поредок што постоеше со децении, го зголемија стравот од рецесија и ги вознемирија берзите. Кина вчера ги обвини САД за уценувачко однесување и вети дека нема да отстапи во војната на царини. Трамп пред неколку дена ги удвои првично најавените царини за Кина откако таа возврати со давачки од 34% за САД.

Кина се пожали во Светската трговска организација дека новите американски царини дополнително ќе ја дестабилизираат глобалната трговија.

„Ситуацијата опасно ескалираше. Потегот на САД беше крајно невнимателен. Реципрочни мерки не се и никогаш нема да бидат лек за трговска нерамнотежа. Место тоа, тие ќе им наштетат на САД“, кажа Пекинг.