Кинеската војска ненадејно започна со вежби околу Тајван како остро предупредување против сепаратизмот, при што тајванскиот претседател Лаи Чинг-те беше наречен паразит. Тајван испрати воени бродови како одговор на доближувањето на кинеската морнарица до островот.

Вежбите со кои Кина го окружи Тајван доаѓаат откако Лаи ја опиша Кина како непријателска странска сила минатиот месец. Започнувајќи ги вежбите, Кина го осуди Лаи како сепаратист и објави анимирано видео во кое тој беше прикажан како бубачка која е паразит.

„Фокусот е ставен на вежбите за борбена готовност на море и во воздух, заземање сеопфатна контрола, удар врз поморски и копнени цели и наметнување блокадни контроли на клучните области и рути“, се вели во соопштението на Источната команда на кинеската војска.

Тајванската влада ги осуди вежбите и кажа дека Кина е „широко призната од меѓународната заедница како предизвикувач на проблеми“.

„Само народот на островот може да одлучува за својата иднина“, кажа тајванската влада.

Оттаму рекоа дека близу Тајван се забележани повеќе од десет кинески воени бродови, но досега не се регистрирани пукања со боева муниција.

Вежбите почнаа откако американскиот министер за одбрана Пит Хегсет замина од регионот по посетите на Јапонија и Филипини, каде што ја критикуваше Кина.

„Пекинг сака да избегне каква било намерна конфронтација со Вашингтон пред трговските преговори помеѓу САД и Кина и затоа Тајван ѝ е најдобар изговор“, изјави еден тајвански функционер.