Портпаролот на Кремљ, Дмитри Песков, изјави дека средба помеѓу Доналд Трамп и Владимир Путин ќе биде договорена, но засега не може да се каже кога точно ќе се случи. Тој се огласи откако специјалниот претставник на Трамп, Стив Виткоф, синоќа бил во Москва.
„Средбата ќе биде договорена откако Виткоф ќе го информира Трамп за разговорите во Москва. Кај двете страни постои разбирање дека има потреба од директни разговори“, изјави Песков.
Тој потврди дека Виткоф се сретнал со Путин, при што размениле информации, а рускиот претседател му испратил „дополнителни сигнали на Трамп“.
Во првото обраќање по разговорите САД-Украина во Саудиска Арабија, Путин вчера кажа дека го прифаќа предлогот за 30-дневно примирје, но само ако прекинот на огнот доведе до траен мир и ги отстрани основните причини за украинската криза. Трамп ја опиша изјавата на Путин како ветувачка, но нецелосна, додека Володимир Зеленски кажа дека е манипулативна.
„Постои претпазлив оптимизам околу предлогот за примирје. Има уште многу работи што треба да се направат, но Путин изрази солидарност со позицијата на Трамп“, рече Песков.
