Лидерот на Хезболах, Сајед Хасан Насрала, предупреди на војна без правила и ограничувања во случај на израелска офанзива против либанската милиција и се закани дека би можеле да го нападнат Кипар ако му дозволи на Израел да ја користи неговата територија во каков било конфликт.

Кипар и Израел имаат билатерален договор за одбранбена соработка, според кој спроведуваат заеднички воени вежби.

„Отворањето на кипарските аеродроми и бази за израелски напади врз Либан би значело дека кипарската влада е дел од војната и ние ќе се однесуваме кон Кипар како да е учесник во војната“, кажа Насрала.

Кипарскиот претседател Никос Христодулидес кажа дека Кипар нема да се меша во ниеден воен конфликт.

„Нашиот хуманитарен коридор кон Блиски Исток е тестамент за нашата посветеност кон мирот и стабилноста. Изјавите на Хезболах не се пријатни, но тие не ја одразуваат реалноста, зашто Кипар не учествува во никакви воени активности“, изјави Христодулидес.

Изјавите на Насрала доаѓаат еден ден откако израелските генерали кажаа дека се планира поширока офанзива против Хезболах, а министерот за надворешни работи Израел Кац изјави дека Израел наскоро ќе одлучи дали да ја прошири војната.

„Имаме 100.000 борци, дури и повеќе во случај на најлошото сценарио и Израел го знае тоа“, изјави Насрала.