Соборениот венецуелски лидер Николас Мадуро е превезен во судот во Менхетн, каде што ќе се соочи со обвиненија поврзани со дрога и оружје, додека Советот за безбедност на Обединетите нации дебатира за легалноста на американскиот упад во Венецуела.

Мадуро и неговата сопруга Силија Флорес, кои беа заробени во саботата, беа одведени од вооружени чувари од притворот во Бруклин, по што со хеликоптер беа превезени до федералниот суд во Менхетн. Меѓу другото, Мадуро е обвинет дека надгледувал мрежа за трговија со кокаин која соработувала со моќните наркокартели од Мексико и Венецуела и со колумбиските бунтовници.

„Мадуро е обвинет за заговор за нарко-тероризам, заговор за увоз на кокаин, поседување митралези и деструктивни направи и за заговор за користење митралези и деструктивни направи против САД. Наскоро ќе се соочи со целиот гнев на американската правда на американска почва во американските судови“, кажа јавната обвинителка на САД, Пем Бонди, во саботата, не наведувајќи за што е обвинета сопругата на Мадуро.

Мадуро ќе го застапува адвокатот Бери Полак од Вашингтон, кој се избори за ослободувањето на основачот на „Викиликс“, Џулијан Асанж.