Властите на Шри Ланка кажаа дека мајмун е виновен што снема струја низ целата земја во неделата откако упаднал во електрана јужно од Коломбо. По некое време, струјата почнала постепено да се враќа низ островската држава со 22 милиони жители, но дел од нив биле без струја до вечерните часови.

„Еден мајмун дошол во контакт со трансформатор од националната електрична мрежа, предизвикувајќи нерамнотежа во системот“, изјави министерката за енергетика Кумара Џајакоди.

Исклучувањето започна околу 11 часот по локално време, принудувајќи многумина да се потпрат на генераторите. Официјални лица во прв момент рекоа дека ќе бидат потребни неколку часа за да се обнови снабдувањето со струјата.

Локалните медиуми објавија дека инженерите со години ги предупредуваа владите на Шри Ланка да ја надградат електричната мрежа или би можело да има колапси.