Илон Маск ја продаде социјалната мрежа Икс на својата компанија за вештачка интелигенција „xAI“ за 33 милијарди долари, потврди тој. Двете фирми се во приватна сопственост, па не се обврзани да ги објават своите финансии јавно.

„Овој потег ќе отклучи огромен потенцијал со спојување на напредната способност на вештачката интелигенција и експертизата на ‘xAI‘ со огромниот дострел на Икс“, рече Маск.

Тој додаде дека договорот ја вреднува „xAI“ на 80 милијарди долари и Икс на 33 милијарди долари.

Маск ја купи тогашната платформа Твитер за 44 милијарди долари во 2022, по што го растури неговиот персонал. ги промени неговите политики за говор на омраза, дезинформации и проверка на корисниците и го преименуваше во Икс. Тој ја отвори „xAI“ една година подоцна.

Нејасно е дали овој потег ќе промени нешто за корисниците на Икс, зашто „xAI“ веќе ги користи податоците од објавите на Икс за да ги обучува своите модели за вештачка интелигенција.