61-годишен маж починал од тешките повреди откако бил вовлечен во апарат за магнетна резонанца бидејќи носел метален синџир околу вратот, соопшти американската полиција.

Инцидентот се случил во средата попладне во медицинска установа во Вестбери, Њујорк. Според полицискиот оддел на округот Насау, мажот влегол во просторијата каде што се наоѓал апаратот додека скенирањето било во тек.

„Поради големиот метален синџир што го носел на вратот, силното магнетно поле на апаратот го повлекло кон него, што предизвикало сериозни повреди“, се вели во соопштението на полицијата.

Мажот, чие име не е објавено, веднаш бил пренесен во локална болница во критична состојба. Тој им подлегнал на повредите и бил прогласен за мртов во четвртокот попладне. Полицијата соопшти дека истрагата е во тек.

Апаратите за магнетна резонанца користат силно магнетно поле за да произведат детални слики, а пациентите секогаш се советуваат да го отстранат накитот и другите метални предмети пред скенирањето.