Владимир Путин повторно го назначи технократот Михаил Мишустин за руски премиер, откако тој не покажа големи политички амбиции во својот претходен мандат. Согласно руските закони, владата на 58-годишниот Мишустин прво поднесе оставка откако Путин го почна петтиот претседателски мандат.

Политичките набљудувачи го очекуваа повторното назначување на Мишустин, велејќи дека Путин ги цени неговите вештини и тоа што политички не се истакнува. Во својот претходен мандат, Мишустин не даваше политички изјави и избегнуваше интервјуа во медиумите.

Мишустин и другите технократи во владата беа фалени што успеаја да ја одржат руската економија релативно стабилна среде војната во Украина и западните санкции.

Се очекува повеќето досегашни министри да ги задржат своите позиции, но неизвесна е судбината на министерот за одбрана Сергеј Шојгу, особено по неодамнешното апсење на неговиот заменик Тимур Иванов за корупција. Овој чин многумина го сфатија како напад врз Шојгу и можен вовед во негова смена.