И покрај дождот, значително повеќе од најавените 100.000 луѓе се собраа во Берлин на демонстрации против партијата Алтернатива за Германија (АфД) и екстремната десница. Повеќе од 150.000 луѓе се на лице место, напиша полицијата попладнево на платформата Х. Организаторите рекоа дека има околу 300.000 учесници.

Беа регистрирани вкупно 100.000 луѓе. Беше планиран човечки синџир под мотото „Ние сме заштитниот ѕид“. Акцијата против омраза и нетолеранција е поддржана од сојуз наречен Рака под рака на повеќе од 1.300 организации.

„Сакаме да дадеме пример за солидарност и дека сме против дискриминација. И дека мислиме оти е одлично кога во Германија продолжува да постои општество со различност наместо униформност“, рече 36-годишниот Серкан Бингол, берлинец со германски пасош и професор во средно училиште, кој дошол со група бегалци.

Веќе неколку недели, десетици илјади луѓе излегуваат на улиците низ цела Германија за да протестираат против десничарскиот екстремизам поттикнат од состанокот на екстремистите во Потсдам, каде што се разговараше за концептот на „ремиграција“, имено депортирање на голем број луѓе од странско потекло, дури и под принуда.

Истражувањето спроведено од истражувачкиот институт ИНСА покажа дека 61% од граѓаните во Германија веруваат оти демократијата во земјата е под закана. Истражувањето е спроведено за неделното издание на високотиражниот весник „Билд“. Третина од испитаниците, од друга страна, не сметаат дека германската демократија е загрозена, според истражувањето. Повеќе од половина од испитаниците, 55%, ги поздравија демонстрациите, 26% ги отфрлија, додека 12% беа рамнодушни кон протестите.