Спасувачките екипи велат дека има итна потреба од храна, вода и засолништа во најтешко погодените делови на Мјанмар по земјотресот кој уби над 2.700 луѓе. Тие додаваат дека граѓанската војна ги попречува напорите помошта да стигне до оние на кои им е потребна.

Воените власти на Мјанмар објавија дека бројот на загинати пораснал на 2.719, над 4.500 луѓе се повредени, а повеќе од 440 се водат како исчезнати. Земјотресот имал јачина од 7,7 степени според Рихтеровата скала и е најсилниот кој ја погодил Југоисточна Азија во последните 100 години, уривајќи и модерни згради и древни храмови.

Земјотресот предизвика жртви и штети и во соседниот Тајланд, каде што за миг се урна 30-катна зграда во изградба во главниот град Бангкок. Спасувачите и натаму пребаруваат по урнатините на зградата, но велат дека од утрово веќе не слушаат знаци на живот. На оваа локација и натаму се заробени повеќе од 70 луѓе.

„Спасувачите денеска ќе копаат подлабоко, за првпат со тешки машини. Во почетокот на операцијата беа забележани преживеани под урнатините, но оттогаш се најдени само мртви тела, вкупно 13. Иако не се откажуваме од надежта, ова сега е операција за извлекување тела, што исто така нема да биде лесно“, изјави гувернерот на Бангкок, Чадчарт Ситипунт.

Во областа Мандалеј во Мјанмар загинале 50 деца и двајца учители откако се урнала градинката во која престојувале.

„Во најпогодените области луѓето се мачат да ги задоволат своите најнеопходни потреби, како што е пристап до чиста вода, додека спасувачките тимови неуморно продолжуваат да бараат преживеани и да доставуваат помош“, објави Канцеларијата за координација на хуманитарната помош на Обединетите нации.

Граѓанската војна во Мјанмар, каде што воената хунта ја презеде власта по пучот во 2021, ги усложнува напорите за доставување помош за повредените и оние кои останале без дом. Бунтовничките групи велат дека хунтата продолжила да изведува воздушни напади и по земјотресот.