Болен астронаут се врати на Земјата со тројца свои колеги, прекинувајќи ја мисијата на Меѓународната вселенска станица еден месец порано од предвиденото, што беше првата медицинска евакуација на НАСА досега. Нивната капсула падна во Тихиот Океан близу Сан Диего 11 часа откако ја напушти станицата.

„Убаво е повторно да се биде дома“, изјави заповедничката на капсулата Зина Кардмен.

На Меѓународната вселенска станица сега се останати само еден руски и двајца американски астронаути и „СпејсЕкс“ кажа дека ќе се обиде да однесе нов четиричлен екипаж во средината на следниот месец.

Покрај Кардмен, во капсулата што се врати на Земјата беа уште еден Американец, Мајк Финке, Јапонецот Кимија Јуи и Русинот Олег Платонов. Официјални лица не го открија идентитетот на астронаутот кој имал здравствени проблеми и за што станува збор.

Иако астронаутот бил стабилен во орбитата, НАСА сакаше тие да се вратат на Земјата што е можно поскоро за да добие соодветна грижа и дијагностичко тестирање. Тој се разболел или се повредил на 7 јануари, по што НАСА ја откажа вселенската прошетка на Кардмен и Финке закажана за следниот ден.