Државните обвинители на БиХ наредија апсење на лидерот на Република Српска, Милорад Додик и на двајца негови соработници поради игнорирање судски покани, што би можело дополнително да ја загрози стабилноста на земјата.

Ова не е поврзано со неодамнешната судска пресуда, со која Додик доби една година затвор и шестгодишна забрана за вршење јавна функција. Покрај Додик, издаден е налог за апсење и на премиерот на РС, Радован Вишковиќ и спикерот на регионалниот парламент Ненад Стевандиќ.

Обвинителството ја повика Државната агенција за истрага и заштита (СИПА) да помогне во апсењето откако тројцата не се одзвале на судска покана.

За тоа време, Народното собрание во Бања Лука расправа за промените на уставот на Република Српска, според кои таа ќе има право на самоопределување и ќе формира сопствена војска.

„За неколку месеци, состојбата на теренот ќе биде како во времето на распадот на Југославија. Не сакавме ескалација, но бевме принудени на тоа. Никој во Република Српска нема причина да биде вознемирен“, предупреди Додик.

Тој ѝ порача на СИПА да не доаѓа да го апси.

„Верувам дека нема да дојдат. Ова е свечен ден зашто ми е роденден и го менуваме уставот на Република Српска“, рече Додик.

Шефот на босанските Срби исто така кажа дека ќе побара од Русија да стави вето со цел силите на ЕУФОР да заминат од БиХ.