Доналд Трамп ја ублажи реториката за Володимир Зеленски во пресрет на нивната денешна средба во Вашингтон, па кажа дека има голема почит кон него.
Запрашан од Би-Би-Си дали ќе му се извини на Зеленски за тоа што неодамна го нарече диктатор, Трамп кажа дека не верува дека го рекол тоа.
„Јас сум го кажал тоа? Не верувам. Зеленски е многу храбар“, рече Трамп.
Американскиот претседател првпат го опиша Зеленски како диктатор и го обвини за почеток на војната со Русија откако тој одби да го потпише договорот за ретки минерали со САД, што конечно треба да се случи денеска.
„Мислам дека ќе имаме многу добар состанок со Зеленски. Напорите за постигнување мир се движат доста брзо“, кажа Трамп.
Со потпишувањето на договорот денеска, САД ќе добијат пристап до дел од украинските природни богатства. Зеленски се надеваше дека Украина со тоа ќе добие американски безбедносни гаранции, но тие наводно не се вклучени во првичниот договор.
Деталите од договорот не се објавени во јавност. Украинскиот премиер Денис Шмихал смета дека со него ќе се создаде инвестициски фонд за обнова на земјата, со кој Киев и Вашингтон би управувале под еднакви услови. Зеленски го призна фондот, но кажа дека е прерано да се зборува за пари.
Трамп првично бараше природни ресурси во вредност од 500 милијарди долари, но ова подоцна било намалено.
