Откривањето на огромна неексплодирана бомба од Втората светска војна денеска предизвика транспортен хаос  во Париз, кој вклучува прекин на брзите железнички врски со Лондон и Брисел и затворање на виталната патна артерија во францускиот главен град, запирање на најфреквентната железничка станица во Франција, отежнување на плановите за патување на патниците за викенд.

Хаосот се прошири од железничката до патната мрежа, при што париската полиција објави затворање на автопатот А1 и делови од секогаш фреквентната обиколница доколу градот, додека експертите за отстранување бомби работеа на тоа да го направат безбеден експлозивот тежок половина тон.

„Еуростар“, оператор на  брзи возови низ тунелот под Ла Манш, кој ја поврзува Англија со европскиот континент, најави откажување на сите свои услуги до и од својот центар во Париз во Гар ди Норд, најпрометната железничка станица во Франција, и главните градови на Велика Британија и Белгија.

„Нема решение. Ќе се јавиме во хотелот и ќе останеме уште еден ден. И ќе го смениме  нашиот билет за воз“, вели Мишел Гаро, пензиониран парижанец кој се нашол заглавен во Брисел.

Францускиот министер за транспорт Филип Табаро изјави дека проблемите  настанале поради откривањето на бомба тешка половина тон. Работниците ја пронашле во текот на ноќта додека вршеле ископувања во близина на пругите во регионот Сена-Сен Дени што се граничи со Париз на север. Биле повикани експерти за деактивирање бомби.

Табаро рече дека е поставен „прилично голем“ безбедносен периметар околу операцијата за деактивирање бомби и луѓето биле евакуирани. Тој ги повика патниците да ги одложат железничките патувања.

Бомбите останати од Првата или Втората светска војна редовно се откриваат низ Франција, но многу е ретко да се најдат на таква локација преполна со луѓе. Железничката компанија СНЦФ соопшти дека железничкиот сообраќај е запрен на барање на полицијата.