Израелскиот премиер Бенјамин Нетанјаху ѝ нареди на војската веднаш да изведе моќни напади во Газа, кажаа од неговиот кабинет. Ова следува откако Хамас предаде ковчег со тело, за кое Израел кажа дека не е уште еден починат заложник.

„Форензичките тестови покажаа дека останките му припаѓаат на Офир Царфати, чие тело беше извлечено од израелските сили кон крајот на 2023, а не на некој од преостанатите 13 мртви заложници“, изјавија од кабинетот на Нетанјаху.

Владата притоа го обвини Хамас за грубо кршење на примирјето. Хамас кажа дека е посветен на договорот, во чие склучување посредуваа САД, Египет, Турција и Катар, но додаде дека му треба помош за да ги лоцира телата на сите починати заложници, кои се закопани под урнатините.

По објавата на Нетанјаху, Хамас го обвини Израел дека измислува лажни изговори како подготовка за нови агресивни потези во Газа.

Примирјето стапи во сила на 10 октомври и беше прекршено девет дена подоцна, кога Израел го бомбардираше југот на Газа поради смртта на двајца израелски војници.