Израелскиот премиер Бенјамин Нетанјаху се закани дека примирјето во Газа ќе заврши ако Хамас не ги ослободи заложниците до сабота напладне. Ова денеска го побара и Доналд Трамп.

„Тукушто го завршив четиричасовниот состанок на политичко-безбедносниот кабинет и изразивме гнев поради шокантната состојба на тројцата заложници кои беа ослободени во саботата. Го поздравуваме барањето на Доналд Трамп за ослободување на сите заложници до сабота напладне и ја поздравуваме неговата револуционерна визија за Газа. Поради одлуката на Хамас да го прекрши договорот за примирје со тоа што го одложи ослободувањето на заложниците, ѝ наредив на војската да ги зголеми своите сили во и околу Појасот Газа. Ако Хамас не ги врати заложниците до сабота напладне, примирјето ќе биде прекинато и Израелските одбранбени сили ќе продолжат со жестоки борби до целосното уништување на Хамас“, изјави Нетанјаху.

Нејасно е дали тој бара ослободување на сите заложници. Откако почна примирјето, Хамас ослободи 16-мина израелски заложници и петмина Тајланѓани во замена за стотици палестински затвореници. Во првата фаза треба да бидат ослободени уште 17-мина заложници, од кои осуммина биле мртви.

Следната размена требаше да се случи в сабота, но Хамас синоќа објави дека прекинува со ослободувањата зашто Израел го крши договорот за примирје.