Американското Министерство за правда објави милиони нови документи поврзани со покојниот сексуален престапник Џефри Епстин, што претставува најголема количина на податоци споделени од владата по минатогодишното законско решение за нивно обелоденување. Јавноста во петокот доби пристап до три милиони страници, 180.000 фотографии и 2.000 видеоснимки.
Објавувањето доцни шест недели по истекот на рокот предвиден со законот што го потпиша претседателот Доналд Трамп. Заменик-јавниот обвинител Тод Бланш изјави дека со овој чекор завршува сеопфатниот процес на ревизија за да се обезбеди транспарентност пред американскиот народ.
Досиејата содржат детали за престојот на Епстин во затвор, вклучувајќи и психолошки извештај, податоци за неговата смрт додека бил во притвор, како и истражни записи за неговата соработничка Гилејн Максвел. Дел од документите се мејлови меѓу Епстин и високопрофилни личности кои датираат од пред повеќе од една деценија.
Актуелниот американски претседател Доналд Трамп се споменува стотици пати во новите документи. Трамп и претходно потврди дека имал пријателство со Епстин, но тврди дека односите им се влошиле пред многу години и негира какви било сознанија за неговите дела. Меѓу документите е и листа на ФБИ со наводи за сексуална злоупотреба доставени преку телефонска линија за пријави, за кои Министерството за правда вели дека се неосновани, лажни и сензационалистички тврдења испратени пред изборите во 2020 година.
Во преписките се појавува и името на милијардерот Илон Маск. Иако тој претходно изјавуваше дека ја одбил поканата на Епстин за посета на неговиот приватен остров, новите мејлови покажуваат дека за тоа се дискутирало во повеќе наврати. Во порака од ноември 2012 година, Маск прашува во кој ден ќе биде најлудата забава на островот, наведувајќи дека со него би патувала само неговата тогашна сопруга. Во друг мејл од декември истата година, Маск пишува дека му е потребна забава за да се опушти по напорната работа. Во документите нема докази дека Маск навистина отпатувал на островот.
Џефри Епстин почина во август 2019 година во затвор во Њујорк додека чекаше судење за трговија со луѓе.
