Доналд Трамп најмалку осумпати патувал со приватниот авион на Џефри Епстајн, се вели во новообјавените документи за сексуалниот престапник и педофил. Министерството за правда на САД денеска објави уште 29.000 страници документи и десетици видеоснимки, од кои неколку биле снимени во затвор.

Мејл од 7 јануари 2020 содржи записи за летовите на Епстајн, кои покажуваат дека Трамп летал со неговиот приватен авион осумпати од 1993 до 1996. На четири лета била присутна и најблиската соработничка на Епстајн, Гилејн Максвел, а во еден случај од 1993, Трамп и Епстајн се заведени како единствените патници. На друг лет тие биле придружувани од 20-годишна личност, чие име е сокриено.

Трамп не крие дека порано биле пријатели со Епстајн, но се скарале околу 2004, неколку години пред тој да биде уапсен првпат. Трамп негира какво било кривично дело во врска со Епстајн.

„Некои од овие документи содржат невистинити и сензационалистички тврдења против претседателот Трамп, кои беа доставени до ФБИ непосредно пред изборите во 2020. Да бидеме јасни: тврдењата се неосновани и лажни и доколку имаа барем малку кредибилитет, сигурно веќе ќе беа употребени како оружје против претседателот Трамп“, се вели во соопштението на Министерството за правда.

Како и во претходниот случај, бројни документи и сега се редактирани. Министерството за правда претходно кажа дека го задржува тоа право за да се заштитат жртвите и активни кривични истраги.