Обвинителите на Јута и официјално го обвинија осомничениот за атентатот врз конзервативниот активист Чарли Кирк за тешко убиство и ќе бараат смртна казна доколку биде осуден.

Дваесет и двегодишниот Тајлер Робинсон се товари дека испукал еден куршум од снајперско гнездо на покривот на зграда, кој го погодил Кирк во вратот додека држеше говор пред 3.000 луѓе на универзитет вп Јута. Јавниот обвинител на Јута, Џефри Греј, кажа дека се покренати седум обвиненија против Робинсон, вклучувајќи попречување на правдата и манипулирање со сведоци.

„Независно донесов одлука да барам смртна казна врз основа на достапните докази и околности и природата на кривичното дело“, рече Греј.

Властите јавно не го идентификуваа мотивот за убиството. Робинсон, студент на трета година на државен технички колеџ, успеал да избега по пукањето и беше уапсен во четвртокот вечер во куќата на неговите родители, околу 420 километри од местото на злосторството, откако бил пријавен од роднини и семеен пријател.

Триесет и едногодишниот Кирк беше еден од најугледните конзервативни активисти во САД и близок сојузник на Доналд Трамп, на кого му помогна да привлече голем број гласови на младите на ланските избори.