Српскиот претседател Александар Вучиќ кажа дека ќе ги покани ФБИ и руската Федерална служба за безбедност (ФСБ) да ги истражат обвинувањата на опозицијата дека на саботниот масовен протест во Белград бил користен звучен топ, оружје кое е забрането во земјата. Властите продолжуваат да го демантираат ова, додека се засилуваат повиците да се спроведе независна истрага.

Српски групи за човекови права и опозициски политичари тврдат дека на протестот било употребено оружје ќе емитира насочен зрак кој привремено онеспособува луѓе. Тие кажаа дека ќе поднесат тужба до меѓународни и домашни судови.

„Тоа е зла лага чија цел е да се уништи Србија. Ќе ги поканам ФБИ и ФСБ да ги истражат овие тврдења. Важно е за историјата да се види како лажеле“, изјави Вучиќ.

Српски функционери индиректно признаа дека полицијата располага со вакво оружје од пред две години, но инсистираа дека не било употребено во саботата.

Во петицијата што досега ја потпишаа половина милион луѓе се бара од Обединетите нации, Советот на Европа и ОБСЕ да спроведат независна истрага за употребата на звучен топ против мирните демонстранти на 15 март во Белград. И бившиот претседател на Србија Борис Тадиќ побара меѓународна помош „за да се утврди вистината за настаните кои предизвикаа грубо нарушување на јавната безбедност и ги загрозија здравјето и животите на српските граѓани“.

Стотици илјади луѓе од цела Србија се приклучија на масовниот антивладин протест во Белград во саботата. При 15-минутното оддавање почит на жртвите на уривањето на настрешницата на железничката станица во Нови Сад некои луѓе се пожалиле на ненадеен продорен звук, што доведе до паника и кратко стампедо. Вакви оружја можат да предизвикаат остра болка во ушите, паника и дезоринтираност, велат експертите. Многумина кои биле во епицентарот на наводниот напад се пожалија на социјалните мрежи дека имале силна главоболка, мачнина и дезориентираност.