Лидерот на унгарската опозиција Петер Маѓар ја започна својата предизборна кампања во Будимпешта, ветувајќи дека ја обнови западната ориентација на Унгарија ако го победи премиерот Виктор Орбан на изборите на 12 април.

Маѓар, кој порано беше член на владејачката партија Фидес, се издвои на унгарската политичка сцена во 2024, кога ја формираше партијата Тиса. Откако освои 30% гласови на изборите за Европскиот парламент во јуни 2024, Тиса стана најголемиот предизвик за Орбан откако ја презеде власта во 2010. Повеќето независни анкети предвидуваат победа на Тиса на изборите.

„Се наоѓаме на прагот на победа на 56 дена до изборите. Тиса е спремна да владее“, рече Маѓар.

Тој досега се фокусираше на основните прашања, како што се ниските плати и растечките трошоци за живот, што ја направија Унгарија една од најсиромашните земји во Европската Унија. Маѓар ги обвинува Орбан и неговата влада за лошо управување со економијата и социјалните услуги и за неконтролираната корупција, за која вели дека довела до акумулација на екстремно богатство кај мал круг добро поврзани луѓе. Тој, исто така, го критикуваше Орбан за водење борбена надворешна политика со ЕУ, додека одржува блиски врски со Русија.

„Местото на Унгарија е во Европа, не само затоа што на Унгарија ѝ е потребна Европа, туку и затоа што на Европа ѝ е потребна Унгарија“, рече Маѓар.

За разлика од Тиса, која ги изложи своите планови во програма од 239 страници, Фидес вели дека по 16 години владеење гласачите знаат какви политики да очекуваат.

Маѓар најави дека планира да ја задржи оградата што владата на Орбан ја изгради долж јужната граница на земјата во 2015 и рече дека ќе продолжи со политиките на Фидес за спротивставување на нелегалната имиграција и на секоја забрзана постапка за пристапување на Украина во ЕУ. Сепак, тој вети дека ќе врати милијарди долари средства што ЕУ ги суспендираше за Унгарија поради загриженоста дека Орбан ги еродирал демократските институции, ја намалил независноста на судството и не се справил со корупцијата.