Виктор Орбан призна дека доживеал неочекувано тежок пораз на парламентарните избори во Унгарија, но кажа дека нема да отстапи од лидерската функција во партијата Фидес, која по цели 16 години ќе биде во опозиција.

„Ова е јасен пораз. Нивото на пораз е големо“, изјави Орбан во интервјуто за провладиниот сајт „Патриота“, огласувајќи се за првпат од изборите на 12 април.

Фидес ќе има само 55 пратеници во новиот состав на парламентот, додека Тиса на Петер Маѓар освои двотретинско мнозинство, заземајќи 138 од 199 места.

„Чувствував болка и празнина по изборите и се посветив на мојата работа како терапија за да се справам со шокот. Дури и јас мислев дека ќе победиме“, рече Орбан.

Маѓар најави раскинување со националистичко-популистичкото владеење на Орбан, па вети дека ќе ја премести премиерската канцеларија од Кармелитската палата во Будимпешта.

Орбан не ја избегнуваше одговорноста за поразот во своето интервју.

„Ја преземам вината 100% на себе. Јас сум претседател на партијата. Фидес не успеа да се поврзе со електоратот. Мора да признам дека пораката на противникот беше посилна“, рече тој, алудирајќи на ветувањето на Маѓар за промени фокусирани на искоренување на корупцијата и демонтирање на политичката машина на Орбан.

Но, поразениот премиер рече дека не оди никаде.

„Мојот пораз бара целосно обновување на Фидес и на пошироката унгарска десница. Ако мојата заедница ми каже да седнам во задниот ред, ќе биде така. Ако ми кажат да го поведам тимот на терен, ќе го направам тоа“, рече тој.

Партиското собрание е закажано за 28 април.