Денеска и утре нема да има летови Скопје-Виена откако кабинскиот персонал на „Аустријан ерлајнс“ (АУА) го почна претходно најавениот дводневен штрајк поради спорот околу платите. Поради штрајкот ќе бидат откажани вкупно 400 летови на 28 и 29 март, што ќе опфати 50.000 патници.

Раководството на „АУА“ го критикуваше штрајкот, истакнувајќи дека компанијата има значителни финансиски загуби. Од компанијата кажаа дека нивната последна понуда, која вклучува покачување на платите на копилотите за 28%, е великодушна и би ги направила вработените во „АУА“ едни од најдоброплатените во Австрија.

Спорот се фокусира на зголемувањето на платите и на воочената разлика помеѓу платите во „АУА“ и во нејзината матична компанија „Луфтханза“. Претставниците на синдикатот тврдат дека бонусите за вработените и потенцијалните идни зголемувања не се мерки кои ќе ги решат основните разлики во платите.