Американскиот министер за одбрана Пит Хегсет негираше дека обидите на САД да договорат мир помеѓу Русија и Украина е предавство на украинските војници кои се борат против инвазијата веќе три години.

„Ова не е предавство. Ова е признание дека целиот свет и САД вложуваат во мир и во преговори за мир“, кажа Хегсет пред денешната средба на министрите за одбрана на членките на НАТО.

Тој вчера кажа дека Украина не треба да се надева на членство во НАТО и на враќање во своите граници пред 2014 година.

„Ниедна држава не беше толку посветена кон Украина како Америка, која инвестираше над 300 милијарди долари во стабилизирање на фронтот по руската агресија. Светот може да биде среќен што го има Доналд Трамп. Тој е најдобриот преговарач на планетата, само тој може да ги собере големите сили за да се постигне мир“, кажа Хегсет.

Тој додаде дека војната во Украина беше ресетирање за НАТО и ги повика членките да ги зголемат трошоците за одбрана.

Германскиот министер за одбрана Борис Писториус ја поздрави можноста за брз мировен договор помеѓу Русија и Украина, но жали што владата на Трамп направила јавни отстапки за Путин уште пред да почнат преговорите.

„Европа мора да биде вклучена во преговорите, зашто директно ќе ги чувствува последиците од каков било договор“, рече Писториус.

Доналд Трамп кажа дека и Владимир Путин и Володимир Зеленски изразиле желба за мир во одделни телефонски разговори вчера, додавајќи дека им наредил на државниот секретар Марко Рубио, директорот на ЦИА Џон Ретклиф, советникот за национална безбедност Мајкл Волц и на специјалниот претставник за Украина Стив Виткоф да почнат разговори за крај на војната.