„Парамаунт“ се согласи да му плати 16 милиони долари на Доналд Трамп поради монтажата на интервјуто со Камала Харис во емисијата „60 минути“ на Си-Би-Ес во октомври. Компанијата кажа дека парите нема да ги добие самиот Трамп, туку неговата идна претседателска библиотека. Спогодбата не вклучува извинување за Трамп.

Адвокатот на Трамп, Едвард Ендрју Палцик, рече дека претседателот претрпел ментална болка поради монтирањето на интервјуто, додека „Парамаунт“ и Си-Би-Ес го отфрлија неговото тврдење дека интервјуто било монтирано за да се подобри начинот на кој звучи Харис. Тие бараа тужбата на Трамп да биде отфрлена.

Случајот беше внимателно следен од застапниците на слободата на медиумите и од новинарите во Си-Би-Ес, чии адвокати кажаа дека тужбата е „целосно без основа“ и ветија дека енергично ќе се борат против неа.

Во почетокот на февруари, „60 минути“ објави целосна, немонтирана транскрипција од интервјуто.

Трамп, кој одби да биде интервјуиран за „60 минути“, се побуни поради монтажата зашто Харис дава два различни одговора на прашање од водителот Бил Витакер, емитувани во одделни снимки во текот на денот. Си-Би-Ес соопшти дека тие биле дел од долг одговор на Харис, но биле измонтирани за да биде поконцизен. Адвокатот Палцик рече дека тоа предизвикало конфузија и ментална болка и ги довело гласачите во заблуда.

Во декември, Еј-Би-Си ја реши тужбата за клевета од Трамп поради изјавите на водителот Џорџ Стефанопулос, согласувајќи се да плати 15 милиони долари за претседателската библиотека на Трамп, наместо да се вклучи во јавна борба.