Најмалку пет лица загинаа во Иран за време на петтиот ден од масовните протести предизвикани од економскиот колапс и високите трошоци за живот. Судирите меѓу граѓаните и безбедносните сили се интензивираа во повеќе градови низ земјата, а според извештаите на новинската агенција „Фарс“ и организацијата „Хенгав“, жртви има во градовите Лордеган, Азна и Кухдашт.

Протестите, кои започнаа како револт поради остриот пад на вредноста на иранската валута во однос на доларот, брзо прераснаа во пошироки политички демонстрации. На видеата објавени на социјалните мрежи се гледаат запалени возила и жестоки улични борби, а демонстрантите упатуваат пораки против врховниот лидер на државата, додека дел од нив повикуваат и на враќање на монархијата.

Иако властите прогласија неработни денови за училиштата и јавните институции, официјално за да се заштеди енергија поради студеното време, многумина ова го протолкуваа како обид да се сопрат собирите. Во Техеран се распоредени засилени полициски сили во деловите каде што започнаа првите протести на дуќанџиите.

Претседателот Масуд Пезешкиан изјави дека неговата влада ќе ги сослуша „легитимните барања“ на граѓаните. Сепак, истовремено пристигна и предупредување од јавниот обвинител Мохамад Мовахеди-Азад, кој најави „одлучен одговор“ против секој обид за создавање нестабилност во државата.

Ова се најмасовните протести во Иран по оние во 2022 година по смртта на Махса Амини, иако засега не се на истото ниво на распространетост како тогашните немири.