Доналд Трамп кажа дека има добри шанси војната помеѓу Русија и Украина да заврши откако Вашингтон имал „продуктивни разговори“ со Владимир Путин вчера.

Тој кажа дека побарал од Путин да ги поштеди животите на илјадниците „целосно опколени“ украински трупи во Курск, каде што од август држат територија. Нејзината големина значително се намали во изминатите денови по брзата руска противофанзива и Трамп го повика Путин да спречи „ужасен масакр каков што не е виден од Втората светска војна“.

При посетата на Курск пред неколку дена, Путин порача дека заробените украински војници ќе се третираат како терористи, но денеска кажа дека ќе бидат поштедени ако се предадат. Украина негираше дека нејзините сили се опколени во Курск, но Володимир Зеленски призна дека ситуацијата е многу тешка.

„Го слушнав апелот на Трамп. Иако украинските трупи вршат злосторства против цивилите што се рамни на тероризам, го прифаќам повикот на Трамп да се земе предвид хуманитарниот аспект. Затоа, ако Украинците го положат оружјето и се предадат, ќе им ги гарантираме животите и ќе добијат третман во согласност со меѓународното право и правото на Руската Федерација“, кажа Путин во обраќањето на својот совет за безбедност.

Минатиот август, Украинците неочекувано го преселија војувањето во рускиот регион Курск, каде што за кратко време зазедоа територија од над 1.300 квадратни километри и стотина населени места.

„Извештаите за опколувањето на украински единици во Курск се лажни и измислени од Русите заради политичка манипулација. Денеска имаше 13 судири и ситуацијата на бојното поле останува главно непроменета“, соопшти украинската војска.