Украинските истражители кажаа дека пронашле 63 тела на цивили близу неодамна ослободениот град Херсон на кои имало траги на мачење. Тие исто така откриле 11 илегални затвори и четири соби за мачење во градот, каде што десетици мажи биле приведени, мачени со струја, тепани, а некои и убиени.

Властите кажаа дека руските војници презеле малолетнички притвор во средина на март и го претвориле во затвор за локални жители кои одбивале да соработуваат со нив или биле обвинети за партизанска активност.

Повеќе од 700 луѓе се водат како исчезнати и се стравува дека се или мртви или присилно одведени на окупираните територии или во Русија.

„Истрагата за руските злосторства само што почна, зашто ќе се откриваат уште многу зандани и гробови“, изјави министерот за внатрешни работи Денис Монастирски.

Шеесет и деветгодишниот Олександр Максименко вели дека делел соба со 15 мажи кои биле безмилосно тепани и мачени, понекогаш и со струја.

„Беше ужасно. Еден затвореник имаше модринки по целото тело и осум дена не можеше да застане на нозе по претепувањето“, кажа Максименко, кој сега живее во Киев и не планира да се враќа во Херсон.

Поранешната новинарка во локална телевизија Анжела Слободијан кажа дека Русите приведувале и жени.

„Повеќе од еден месец бев притворена и изложена на психолошка тортура. Често гледав тела замотани во пластика кои беа изнесувани кога сослушувањата би отишле предалеку“, откри таа.

Херсон е само уште еден случај каде што руските сили се обвинуваат за воени злосторства по повлекувањето. Русија продолжува да негира дека напаѓа цивили во Украина.