Поранешниот фински претседател Марти Ахтисари, кој доби Нобелова награда за мир, почина на 86 години, три години откако му беше дијагностицирана Алцхајмеровата болест. Ахтисари беше претседател на Финска од 1994 до 2000 и посредуваше за постигнување мир во конфликтните зони во Косово, Индонезија и Северна Ирска. Тој одбиваше да прифати дека војните и конфликтите се неизбежни.
„Мирот е прашање на волја. Сите конфликти можат да се решат. Нема изговор за нивно претворање во бесконечни“, кажа Ахтисари, кога ја примаше Нобеловата награда во 2008.
Тој имаше важни функции во министерството за надворешни работи и помогна Финска да излезе од сенката на Советскиот Сојуз, а како политички аутсајдер победи на претседателските избори во Финска во 1994 и потоа го поддржуваше членството на земјата во ЕУ и НАТО.
Делувајќи во името на ЕУ, Ахтисари во 1999 го убеди Слободан Милошевиќ да ги прифати условите на НАТО за крај на војната на Косово, каде што подоцна стана специјален претставник на Обединетите нации и му го отвори патот кон независноста.
