Талибанците се соочија со прв јавен отпор откако во неделата влегоа во Кабул и прогласија крај на војната, откако досегашниот потпретседател Амрула Салех изјави дека е нов легитимен претседател на Авганистан. Тој тврди дека оваа функција му припаѓа според уставот откако претседателот Ашраф Гани избега од државата во неделата и не е познато каде се наоѓа моментално.

„Останувам во земјата и сум во контакт со сите лидери, со цел да се обезбедат нивната поддршка и консензус“, напиша Салех на Твитер.

Во друг твит, Салех вели дека не е обесхрабрен и ги повика Авганистанците да се придружат на отпорот против талибанците.

Поранешниот директор на авганистанската разузнавачка агенција е дециден дека под никакви околности нема да им се предаде на талибанците, нарекувајќи ги терористи.