Претседателот на Колумбија Густаво Петро изјави дека кокаинот не е ништо полош од вискито и не е легален само зашто доаѓа од Јужна Америка.

Колумбија е најголемиот светски производител и извозник на кокаин и со децении се бори против шверцерите на дрога, но левичарскиот лидер на Колумбија тврди дека кокаинот станал жртвено јагне на американските политичари кои водат повеќедецениска војна против дроги.

„Кокаинот е илегален зашто се прави во Јужна Америка, не зашто е полош од вискито. Научниците го анализираа тоа: кокаинот не е полош од вискито. Глобалната кокаинска индустрија би можела лесно да се растури доколку дрогата се легализира низ целиот свет. Ако некој сака мир, треба да се растури бизнисот со шверц на дрога и да се легализира кокаинот во светот. Би се продавал како вино“, кажа Петро на владина седница.

Тој го посочи примерот со фентанилот, кој убива Американци, а не се произведува во Колумбија.

„Фентанилот бил создаден како фармацевтски лек од северноамерикански мултинационални компании и оние кои го користат стануваат зависни“, рече Петро.

Во Колумбија е регистрирано рекордно производство на кокаин во 2023, пораснувајќи за 53% на над 2.600 тони, според Канцеларијата за дрога и криминал на Обединетите нации.