Володимир Зеленски изјави дека Владимир Путин е единствениот руски функционер со кој би се сретнал откако ќе се договори преговарачката рамка заедно со САД и европските лидери.

Украинскиот претседател пристигна во Минхен за годишната Безбедносна конференција, на која што Русија не е поканета, наспроти најавите од Доналд Трамп дека тристраните мировни разговори за Украина ќе почнат уште денеска.

„Спремен сум да разговарам само со Владимир Путин за крајот на војната во Украина и тоа ќе се случи дури откако ќе се договори план со Трамп и европските лидери“, кажа Зеленски.

Тој додаде дека Трамп му го дал неговиот личен телефонски број и му рекол дека може да му се јави во кое било време.

„Имав добар телефонски разговор со Трамп и ми кажа дека Путин сака да ја реши војната. Она што е важно е дека не смеат да се носат никакви одлуки за Украина без Украина“, кажа Зеленски.

Тој призна дека САД никогаш не ја сакале Украина во НАТО.

„Тоа го нагласија и сега. Украина ќе мора двојно да ја зголеми својата војска ако не стане членка на НАТО. Ако не сме во НАТО, тогаш ќе направиме НАТО во Украина“, изјави Зеленски.