Вселенското истражување доживеа нов момент откако приватното вселенско летало „Син дух“ успешно слета на Месечината, станувајќи само второто комерцијално летало кое што стигнало на лунарната површина.

„Син дух“, лансиран од американската компанија „Фајрфлај“ на 15 јануари, имаше за цел да го истражува Морето на кризите, огромен кратер видлив од Земјата. Овој проект е уште една успешна соработка помеѓу американската вселенска агенција НАСА и приватни компании, насочена кон забрзување на вселенското истражување.

Друга компанија, „Интуитив Машинс“, се надева дека нејзиното вселенско летало „Атина“ ќе слета во близина на јужниот пол на Месечината во следните неколку дена. „Интуитив Машинс“ беше првата приватна компанија која оствари слетување на Месечината со вселенското летало „Одисеј“ на 22 февруари минатата година. Сепак, таа мисија беше кратка, бидејќи „Одисеј“ слета на падината на кратер, скрши дел од опремата за слетување и се преврте.

За разлика од тоа, „Син дух“ слета непречено, откако кружеше околу Месечината изминатите две недели. Во седиштето на „Фајрфлај“ во Тексас избувна аплауз и еуфорија кога персоналот беше информиран за успешното слетување.

Планетарниот истражувач Симеон Барбер кажа дека „Син дух“ е суштински првиот успешен приватен потфат на Месечината, бидејќи возилото е неоштетено и реагира.

„Тие демонстрираа технологија за слетување на површината на Месечината, онаква каква што беше заборавена по ерата на Аполо кога имавме астронаути на површината на Месечината“, рече Барбер.

Важноста на Месечината за многу приватни компании, според Барбер, е да ја користат како платформа за истражување на остатокот од вселената.