Германија вели дека засега нема да ја признае палестинската држава, но додава дека овој процес мора да почне веднаш. Ова следува откако Франција, Велика Британија и Канада објавија дека планираат да ја признаат државноста на Палестина во септември.

„За Германија, признавањето на палестинската држава е поверојатно да биде крај на процесот. Договореното решение со две држави останува единствениот начин за постигнување одржливо решение на конфликтот, овозможувајќи им на луѓето од двете страни да живеат во мир, безбедност и достоинство“, изјави германскиот министер за надворешни работи Јохан Вадефул пред посетата на Израел и окупираниот Западен Брег.

Тој додаде дека Израел почнува сѐ повеќе да се наоѓа во малцинска позиција.

„Сѐ поголем број земји, вклучувајќи ги и европските, се подготвени да ја признаат палестинската држава, дури и без претходен процес на преговори. Германија со својата посебна одговорност за Израел не може и не смее да го игнорира ова“, вели Вадефул.

Од 193 членки на Обединетите нации, 147 ја имаат признато палестинската држава. Доколку Франција и Велика Британија формално го направат тоа, САД ќе бидат единствената постојана членка на Советот за безбедност на ОН која не донела ваква одлука.

Решението со две држави е меѓународно поддржана формула за мир помеѓу Израел и Палестинците. Предлага независна палестинска држава на Западен Брег и Газа, со Источен Ерусалим како главен град. Израел го отфрла решението со две држави и вели дека секое конечно решение мора да биде резултат на преговори со Палестинците, а државноста не треба да биде предуслов.

Палестинската самоуправа, која управува со дел од Западен Брег, поддржува решение со две држави. Хамас е против постоењето на Израел на она што го нарекува палестинска земја.