Повеќе од 11 милиони луѓе ја посетиле катедралата „Нотр Дам“ од нејзиното повторно отворање пред една година, што е нов рекорд, соопшти Париската епархија. По петгодишно затворање по катастрофалниот пожар во април 2019, црквата повторно се отвори во декември 2024. Пред пожарот, годишниот број на посетители на катедралата изнесуваше помеѓу 9 и 10 милиони.

За да се зачува молитвената атмосфера за време на богослужбите, стапката на дојдовни посетители беше намалена од 50 на 30 во минута. Со просек од 30.000 посетители дневно, „Нотр Дам“ е исто така најпосетуваниот споменик во Франција, пред базиликата „Сакре кер“, Лувр, Версајската палата и Ајфеловата кула, според извештаите на медиумите.

За 2026 година се планирани неколку промени. Голем број капели ќе бидат редизајнирани, а до крајот на годината треба да се постават шест современи витражи од уметницата Клер Табуре во јужниот коридор. Во септември, двете готски кули на катедралата беа отворени за јавноста откако беа целосно реновирани, а сега имаат двојно спирално скалиште од 20 тони направено од цврст даб кое се издига над 21 метар во внатрешноста на јужната кула.

На врвот од скалите, посетителите можат повторно одблизу да ги видат познатите ѕвона Емануел и Марија. Кулите високи 69 метри, до кои се пристапува со искачување на 424 скали, преживеале низа војни, револуции и други превирања од 13 век до катастрофалниот пожар во април 2019. Иако пламенот силно го оштети иконскиот споменик, кулите останаа во голема мера недопрени. Нивното повторно отворање ја означи последната голема фаза од реконструкцијата на „Нотр Дам“ по пожарот.

Посетителите сега можат за првпат да го истражат и дворот на цистерната, каде што во 18 век стоеле големи резервоари за дождовница. Дворот ги поврзува двете кули и нуди нови погледи на катедралата и покривите на Париз.