Републиканците од Тексас изгласаа да се пронајдат и уапсат десетиците демократски пратеници кои избегаа од оваа сојузна држава за да блокираат план за прецртување на изборните граници во интерес на владејачката партија. По гласањето, гувернерот Грег Абот им нареди на државните војници да „ги лоцираат и уапсат сите членови на Претставничкиот дом на Тексас кои ја напуштиле својата должност“.

Прецртаната изборна мапа би создала уште пет места наклонети кон републиканците во Претставничкиот дом во Вашингтон, каде што тие имаат мало мнозинство.

Најмалку две третини од 150-членото законодавно тело на Тексас мора да бидат присутни за да продолжи гласањето. Кворумот стана недостижен откако повеќе од 50 демократски пратеници ја напуштија државата. Повеќето од нив избегаа во Илиноис, чиј гувернер Џеј-Би Прицкер рече дека „ќе направи сè што може за да ги заштити од заканите со апсење“.

Демократите рекоа дека планираат да останат подалеку од Тексас две недели, до крајот на специјалната законодавна седница.

Вчерашното гласање беше главно симболично зашто налогот за апсење важи само за границите на Тексас. Демократскиот пратеник од Тексас, Рон Рејнолдс, изјави од Чикаго дека заканата со апсење не била ништо повеќе од тактика на заплашување.

Членовите на Претставничкиот дом на Тексас се казнуваат со 500 долари за секој ден кога нема да се појават на работа.

Републиканците од Тексас моментално држат 25 од 38-те места во државниот Конгрес. Тие се надеваат дека со новата мапа би можеле да го зголемат тој број на 30.