Американскиот министер за здравство Роберт Кенеди Џуниор вети масовни тестирања и истражувања со цел да се открие причината за аутизмот во рок од пет месеци. Експертите предупредија дека откривањето на причините за аутизмот нема да биде лесно, а напорите ги нарекоа нереалистични.

Кенеди, кој промовираше оспорени теории дека вакцините предизвикуваат аутизам, кажа дека американското истражување ќе вклучи стотици научници од целиот свет.

„До септември ќе знаеме што ја предизвикува епидемијата на аутизмот и ќе бидеме во можност да ги елиминираме причините“, изјави Кенеди.

Дијагностицирањето на аутизмот значајно се зголеми од 2000 наваму и до 2022, стапката на случаи кај осумгодишници достигна 2,77%, според американскиот Центар за контрола и превенција на болести. Научниците делумно го припишуваат порастот на зголемената свесност за аутизмот и на неговата проширена дефиниција. Националниот здравствен институт на САД троши повеќе од 300 милиони долари годишно на истражувањето на аутизмот.

Кенеди не изнесе детали за својот проект и колку пари ќе бидат потрошени.

„Ќе ги разгледаме вакцините, но ќе разгледаме сѐ. Сѐ е на маса, нашиот систем за храна, нашата вода, нашиот воздух, различни начини на родителство, сите видови промени што можеби ја предизвикаа оваа епидемија“, кажа Кенеди.

Американското здружение за аутизам (АСА) кажа дека планот на Кенеди е штетен и нереалистичен.

„Тоа не е ниту хронична, ниту заразна болест“, кажаа од АСА.