Русија нема да направи големи отстапки во однос на мировниот план за Украина, изјави висок руски дипломат откако протечена снимка откри дека американскиот специјален пратеник Стив Виткоф ја советувал Москва како да му пристапи на Доналд Трамп. Виткоф следната недела ќе патува во Москва со други високи американски претставници за да разговараат со руските лидери за можен план за ставање крај на војната во Украина.

Украинскиот претседател Володимир Зеленски кажа дека е подготвен да ја поддржи мировната рамка подготвена од САД и да разговара за спорните точки со Трамп, барајќи во тоа да се вклучат и европските сојузници.

Најновиот мировен предлог изненади многумина во Вашингтон, Европа и Киев, предизвикувајќи загриженост дека Трамп можеби ќе ја притисне Украина да потпише мировен договор кој е силно наклонет кон Москва. Трамп подоцна кажа дека е постигнат напредок и дека Москва прави отстапки, иако „војната се движи само во еден правец“.

„Не може да се зборува за какви било отстапки или за какво било откажување од нашиот пристап кон клучните точки“, кажа рускиот заменик-министер за надворешни работи Сергеј Рјабков.

Русија потврди дека Виткоф ќе допатува во Москва следната недела, но портпаролот на Кремљ, Дмитри Песков, изјави дека е прерано да се каже дека мировен договор е блиску.

Јури Ушаков, советникот за надворешна политика на Владимир Путин, инсистираше дека Кремљ официјално не го добил првичниот мировен предлог на САД, иако призна дека добиле копија преку други канали.

„Контактите се во тек, вклучително и преку телефон, но никој сè уште не седнал на маса и не разговарал за точките од планот. Тоа не се случило“, изјави Ушаков.

Руските сили контролираат околу 19% од Украина и оваа година напредуваа со најбрзо темпо од 2022.