Русија ја одбележа 80-годишнината од победата над нацистичка Германија во Втората светска војна со огромна воена парада на Црвениот плоштад во Москва, во присуство на Владимир Путин и странски државници. Обраќајќи им се на присутните, Путин кажа дека Русија се сеќава на лекциите од Втората светска војна, која ја спореди со денешната војна во Украина.

„Русија беше и ќе остане неуништлива бариера против нацизмот, русофобијата и антисемитизмот. Вистината и правдата се на наша страна. Целата земја и целиот народ ги поддржуваат учесниците во специјалната воена операција во Украина“, изјави Путин.

Откако во последен момент своето доаѓање го откажаа лидерите на Азербејџан и Лаос, Путин на парадата нагости 27 шефови на држави, вклучувајќи ги претседателите на Кина, Бразил, Венецуела и Србија, додека од ЕУ дојде само словачкиот премиер Роберт Фицо.

Путин нагости 27 шефови на држави на парадата (Фото: Риа новости)

Заповедникот на руските копнени трупи Олег Саљуков ја предводеше парадата на 11.000 војници, вклучувајќи 1.500 кои се бореле во Украина. На парадата учествуваа и 102 кинески војници, како и воени контингенти од Северна Кореја, Виетнам и Монголија, додека руската војска покажа разни видови воена опрема.

Путин еднострано прогласи тридневен прекин на огнот во чест на Денот на победата, иако Украина кажа дека борбите продолжиле и примирјето било прекршено над 700 пати.