Руското министерство за одбрана ги објави првите снимки од лансерот за новата хиперсонична балистичка ракета „орешник“ потврдувајќи го распоредувањето на оружјето во соседната Белорусија. Овој потег ја зајакнува способноста на Русија да напаѓа мети низ Европа.

Белорускиот претседател Александар Лукашенко порано овој месец најави дека земјата ќе добие проектили „орешник“, кои можат да носат и нуклеарна глава.

Москва не откри каде во Белорусија ќе биде стациониран ракетниот систем. Повикувајќи се на американски истражувачи, „Ројтерс“ објави дека би можел да биде распореден во поранешна воздухопловна база во близина на Кричев, околу 307 километри источно од Минск.

За ракетата првпат се дозна во ноември 2024 откако беше употребена во напад врз украинскиот град Днипро, но без експлозивно полнење. Владимир Путин тогаш го опиша нападот како успешен тест и како предупредување до САД и Велика Британија додека тие размислуваа да ѝ обезбедат на Украина проектили со долг дострел.

Минатиот месец, Путин изјави дека Русија ќе започне со масовно производство на „орешник“, тврдејќи дека ракетата не може да се пресретне.