Додека енергетските трошоци во Европа вртоглаво растат, Русија согорува големи количини природен гас, според анализата сооделена со „Би-Би-Си“. Централата во Портоваја, во близина на границата со Финска, секојдневно согорува гас во вредност од околу 10 милиони долари. Експертите велат дека гасот претходно би се извезувал во Германија. Амбасадорот на Германија во Обединетото Кралство изјави дека Русија го согорува гасот затоа што не може да го продаде на друго место.
Научниците се загрижени за големите количини на јаглерод диоксид и саѓи што ги создава согорувањето, што може да го влоши топењето на мразот на Арктикот. Анализата на „Ристад енерџи“ покажува дека од пламенот секојдневно согоруваат околу 4,34 милиони кубни метри гас.
Доаѓа од нова фабрика за течен природен гас (ЛНГ) во Портоваја, северозападно од Санкт Петербург. Првите знаци дека нешто не е во ред дојдоа од финските граѓани кои летово над блиската граница забележаа голем пламен на хоризонтот. Портоваја се наоѓа во близина на компресорска станица на почетокот на гасоводот Северен тек 1 кој носи гас под морето до Германија.
Испораките преку гасоводот се намалени од средината на јули, при што Русите ги обвинуваат техничките проблеми за ограничувањето. Германија вели дека тоа бил чисто политички потег по руската инвазија на Украина. Но, од јуни, истражувачите забележаа значително зголемување на топлината што произлегува од објектот – се смета дека е од палење гас, согорување на природен гас.
Иако согорувањето на гас е вообичаено во погоните за преработка – обично се прави од технички или безбедносни причини – обемот на ова согорување ги збуни експертите.
„Никогаш не сум видела фабрика за ЛНГ да согорува толку многу“, вели д-р Џесика Мекарти, експерт за сателитски податоци од Универзитетот во Мајами во Охајо. „Почнувајќи околу јуни, го видовме ова огромно зголемување кое не се намалува“.
Мигел Бергер, германскиот амбасадор во Обединетото Кралство, изјави дека европските напори за намалување на зависноста од рускиот гас „имаат силен ефект врз руската економија“.
„Немаат други места каде што можат да го продаваат својот гас, па мора да го запалат“, вели тој.
Марк Дејвис е извршен директор на „Каптерио“, компанија која е вклучена во наоѓање решенија за палење гас. Тој вели дека палењето не е случајно и поверојатно е намерна одлука донесена од оперативни причини.
„Операторите честопати многу се двоумат дали всушност да ги затворат објектите од страв дека може да биде технички тешко или скапо да се стартуваат повторно, а тоа веројатно е случај и овде“, изјави тој.
Други веруваат дека може да има технички предизвици во справувањето со големите количини на гас што се испорачуваа со гасоводот Северен тек 1. Руската енергетска компанија „Газпром“ можеби имала намера да го користи тој гас за производство на ЛНГ во новата централа, но можеби имала проблеми со него и најбезбедната опција е да го согори. Но ова може да биде и резултат на трговското ембарго на Европа кон Русија како одговор на инвазијата на Украина.
