Најмалку осум луѓе загинаа, откако Русија ноќеска жестоко го нападна Киев, објави Володимир Зеленски. Министерот за внатрешни работи Игор Хлименко кажа дека меѓу загинатите се две деца, додека градоначалникот на Киев, Витали Кличко, рече дека има најмалку 38 повредени во огромниот напад со дронови и проектили.
„Кремљ избра балистика место преговарачка маса. Време е за нови, потешки санкции за Русија“, напиша Зеленски на Икс.
Овој напад уследи откако повеќе од 100.000 домови останаа без струја по рускиот напад со дронови врз украинската енергетска инфраструктура вчера.
Шефот на воената управа на Киев, Тимур Ткаченко, кажа дека едно од загинатите деца е 14-годишно девојче и дека најмалку пет деца се меѓу повредените.
„Мета на нападот беа повеќе од 20 населби. Во округот Дарницки делумно се урна петкатница и спасувачките екипи ги пребаруваат урнатините“, кажа Ткаченко.