Густа магла им помага на руските сили да навлезат подлабоко во источниот украински град Покровск, што се обидуваат да го освојат повеќе од една година.

Украинската војска кажа дека временските услови, особено густата магла, ги поттикнале руските сили да ги засилат своите напори за внесување на сè поголем број војници во разурнатиот град, каде што се обидуваат да ги опколат украинските сили во изминатите денови.

Видео објавено на социјалните мрежи прикажува руски војници како возат мотори и автомобили по маглив пат во сцена што наликува на филмот „Лудиот Макс“. Би-Би-Си кажа дека ја потврдил локацијата на видеото, кое било снимено на јужната периферија на градот, на автопатот Селидове-Покровск.

„Неколку дена маглата ги попречуваше видливоста и воздушното извидување. Затоа Русите се осмелија да нападнат со колона возила, кои нормално веднаш би биле збришани од украинските дронови“, кажа украински пилот на беспилотни летала со кодно име Гуска.

Седмиот корпус на украинската војска кажа дека има стотици руски војници во Покровск. Според украинската група за мапирање на фронтот „ДипСтејт“, руските трупи се доближуваат кон повеќето области на Покровск и падот на градот се чини неизбежен.

„Руските сили се обидуваат да ги пресечат логистичките рути за поддршка на украинските трупи во Покровск. Тие напаѓаат патишта за снабдување со дронови, артилерија и пешадија. Оваа тактика се нарекува инфилтрација и се покажа доста успешна“, вели украинскиот воен аналитичар Костјантин Машовец.