Популарниот руски воен блогер Андреј Морозов извршил самоубиство откако бил жестоко критикуван за објавата во која тврдеше дека Русија изгубила 16.000 војници во борбите за Авдиивка. Морозов, кој на Телеграм објавуваше под псевдонимот Мурз, беше ултранационалистички коментатор кој се борел со проруските сепаратисти во источна Украина во 2014 и учествувал во руската инвазија на Украина, која почна пред речиси две години.

Тој имаше 120.000 следбеници на Телеграм, каде што во неделата објави дека во неколкумесечните жестоки борби за Авдиивка загинале или тешко биле ранети 16.000 руски војници, а руската војска изгубила и 300 оклопни возила. Поради тоа беше жестоко напаѓан од руските пропагандисти.

Морозов го најави своето самоубиство во една од последните објави вчера.

„Пропагандистите од државната телевизија се обидуваат да ме замолчат, но тие се преголеми кукавици за да ме убијат. Тогаш, самиот ќе го направам тоа. Ќе се застрелам себеси ако никој нема храброст да го направи тоа“, напишал 44-годишниот Морозов.

Неговата смрт беше потврдена од неколку проруски извори, кои кажаа дека тој се застрелал.