Претседателот Доналд Трамп нареди протерување на 60 руски дипломати од САД, како реакција на нападот врз поранешниот шпион Сергеј Скрипал со нервен гас во Англија.

Слични мерки најавија и Франција, Германија и Украина, како и некои други европски држави.

Лидерите на Европска Унија минатата недела се согласија дека Русија, најверојатно, стои зад нападот врз Скрипал и неговата ќерка во центарот на Салисбури. Русија и натаму негира дека има каква било врска со нападот.

САД, исто така, ќе го затворат рускиот конзулат во Сиетл.

„На 4 март, Русија употреби воен нервен гас во обид да убие британски државјанин и негова ќерка во Салисбури. Овој напад врз нашиот сојузник Велика Британија доведе во опасност неброено многу невини животи и сериозно повреди тројца, вклучувајќи полицаец. Овој напад претставува тешко кршење на Конвенцијата за хемиско оружје и на меѓународни закони“, стои во соопштението на Стејт департментот.