Доналд Трамп објави дека почнувајќи од денеска, САД ќе им помагаат на заглавените бродови да поминат низ Ормускиот Теснец.

„За доброто на Иран, Блискиот Исток и САД, им кажавме на овие земји дека безбедно ќе ги водиме нивните бродови надвор од овие ограничени водни патишта“, напиша тој на социјалните мрежи, без да прецизира кои земји ќе добијат помош.

Трамп рече дека САД ќе се справат со сила со секое мешање во процесот, што го нарече „Проект слобода“.
Иран драстично го ограничи сообраќајот низ Теснецот откако започна војната на 28 февруари, додека САД воведоа поморска блокада на иранските пристаништа.

Ирански пратеник Ебрахим Азизи напиша на социјалните медиуми дека секое американско мешање ќе се смета за кршење на прекинот на огнот.

Трамп истовремено кажа дека американските претставници имале многу позитивни разговори со Иран, „што би можело да води кон нешто многу позитивно“. Иранските државни медиуми вчера соопштија дека Техеран добил одговор од САД на својот последен мировен предлог. Одговорот, доставен преку Пакистан, се разгледувал.

„Операцијата ќе биде хуманитарен гест направен во име на САД, Иран и другите земји од Блискиот Исток. Во сите случаи, тие рекоа дека нема да се вратат сè додека областа не стане безбедна за навигација. Движењето на бродовите има за цел да ослободи луѓе, компании и земји кои не направиле апсолутно ништо лошо“, кажа Трамп, без да даде детали како ќе се одвива соработката со Техеран.

Централната команда на американската војска соопшти дека во „Проектот слобода“ ќе бидат вклучени 15.000 воени лица, разурнувачи со наведувани ракети и повеќе од 100 авиони.

Околу 20.000 морнари се заробени во Заливот од почетокот на војната со Иран, на кои им се намалуваат залихите и постои загриженост за нивното ментално и физичко здравје.