Големо трупање на американските поморски сили во и околу Јужни Кариби ги држи во неизвесност властите во Венецуела и американските експерти, кои се прашуваат дали тоа е поврзано со борба против наркокартели или е нешто друго. Седум воени брода и една напаѓачка нуклеарна подморница се забележани во регионот или наскоро треба да пристигнат, што вклучува вкупно 4.500 морнари и војници.
Доналд Трамп кажа дека борбата против наркокартели е една од главните цели на неговата влада и американски функционери изјавија за „Ројтерс“ дека целта на воените напори е справување со заканите од тие картели.
Стивен Милер, заменик-шеф на кабинетот на Белата куќа, во петокот изјави дека военото засилување имало за цел „борба и разбивање на организациите за трговија со дрога и криминалните картели“, опишувајќи ги како странски терористички организации.
Сепак, не е јасно како американската војска би ја нарушила трговијата со дрога. Поголемиот дел од поморскиот шверц на дрога во САД се одвива преку Пацификот, а не преку Атлантикот, каде што се наоѓаат американските сили, а голем дел од она што пристигнува преку Карибите доаѓа со тајни летови.
Венецуелските власти веруваат дека владата во Каракас би можела да биде вистинската цел. На почетокот на август, САД ја удвоија наградата за информации што би довеле до апсење на венецуелскиот претседател Николас Мадуро на 50 милиони долари, обвинувајќи го за трговија со дрога и врски со криминални групи. Мадуро, министерот за внатрешни работи Диосдадо Кабело и амбасадорот во Обединетите нации, Самуел Монкада, изјавија дека САД ѝ се закануваат на земјата со распоредувањето на морнарички сили.
Иако бродовите на крајбрежната стража и морнарицата на САД редовно оперираат во Јужни Кариби, сегашното зголемување на бројот на војници ги надминува вообичаените распоредувања во регионот. Некои бродови можат да носат летала како хеликоптери и крстосувачки ракети „томахавк“. Исто така, во регионот летаат американски шпионски авиони „P-8“ за собирање разузнавачки информации, изјавија американски функционери.
