Францускиот претседател Емануел Макрон се обиде да го омаловажи инцидентот во кој неговата сопруга Брижит му го турна лицето со двете раце пред да излезат од авионот кога пристигнаа во Виетнам на стартот на турнејата низ Југоисточна Азија.

На видеото се гледа како Брижит Макрон го турка својот сопруг пред тој да слезе од претседателскиот авион, што го натера да се повлече, пред да им мавне на камерите на пистата долу. Таа за момент остана скриена зад трупот на авионот, блокирајќи го погледот на нејзиниот говор на телото. Парот, кој е во брак од 2007, потоа заедно се симна по скалите, но Брижит одби да го фати за рака нејзиниот сопруг.

„Се расправавме, поточно шегувавме со сопругата. Не беше ништо“, им рече Макрон на новинарите во Ханој.

Тој предупреди дека ова не е првпат во последниве недели содржината на видеоснимки со него да биде извртена од луѓе кои тој ги опиша како „глупаци“.

Во врска со последното видео се огласи и Елисејската палата:

„Тоа беше момент кога претседателот и неговата сопруга последен пат се релаксираа со шегување пред почетокот на патувањето. Тоа беше момент на блискост“.